75) Gabietos

Gabietos glaziar aparatua Taillon (3.144 m) eta Gabieto (3.034 m) mendien artean induskatutako zirku txikiaren barruan kokatuta dago. Bere kokapen bereziagatik, Okzitaniako eta Aragoiko Pirinioetako leku eta gailur ugaritatik ikus daiteke.
Bertan dagoen zirku esekiaren morfologiak ez zion kanporantz izotz-mihirik garatzen utzi, zirkuaren irteeran zegoen desnibel nabariak kopeta hausten zuen bitartean, orratz eta serac eran glaziarraren gorputzetik askatzen zen. Izotz Aro Txikian zehar, bere gehienezko luzera ez zen 600 metrotik gorakoa izan eta bere hedadura 12 hekatareakoa izan zen. Garapen-mugek ez zioten utzi mendikateko glaziarrik handienetako bat izaten.
Goiko muturrean, XIX. mendearen amaieran, izotza Col des Gabietosera iritsi zen. Zirkuaren egitura izan da frontearen atzerakada gutxi nabarmentzearen arrazoia. Glaziarraren goiko muturrean izan du galerarik handiena, eta izotzak betetzen zuen desnibela txikiagotu egin da.
XXI. mendearen hasieratik, bere arrakala indartsuek aktibitate ahula erakusten zuen izotzari bide eman zioten, bere mugimendu-ahalmena izugarri murriztuz, hormagune bihurtzeraino. Duela hamar urte inguru, hiruki-forma indartu zitzaion, eta elikatze-zonan ohikoa zen elur geruzatua eta urte askotakoa bereiztea. Aurrealdean, aurreko morrenatik sartuta dagoen laku txiki batek eusten dio urtze-uraren zati bati.
90eko hamarkadan, frontearen beheko eskuinaldeko muturrean, higadura-materialarekin izotza estaltzeko prozesua hasi zen. Prozesu hori areagotu egin da azken urteotan, eta, gaur egun, hormagune beltz da.
Gaur egun, Pirinioetako 18. glaziar-aparatua da hedaduran, eta Gavarnieko 3. glaziarra.